Infantis Nutritio ad Vitam Longam

Si verum dicitis, Scholae, quod possitis sanare quaslibet febres citra evacuationem: sed nolle, prae metu deterioris recidivae. Ad luctam descendite, Humoristae. Sumamus e Xenodociis, e castris, vel aliunde 200 aut 500 pauperes febrientes, pluriticos, &c. partiamur illos per medium: mittamus sortes, ut mihi illorum una medietas cedat, & altera vobis. Ego illos curabo citra phlebotomiam, & evacuationem sensibilem; vos vero facite ut scitis (nec enim vos adstringo ad iactantiam phlebotomi, vel solutivi abstinentiam) videbimus quot funera uterque noftrum habiturus: praemium autem certaminis sint 300 floreni, utrimque depositi. Hic vestrum agitur negotium. O Magistratus, quibus cordi est salus populi! Pro bono publico certabitur, pro veritatis cognitione, pro vita & anima vestra, filiorum, viduarum, pupillorum totiusque sanitate populi. Ac tandem pro methodo curativa, in actuali contradictorio disputata. Superaddite praemium, honorarii loco, ex officio. Compellite nolentes intrare in certamen, vel palaestra obmutescentes cedere. Ostendant tum, quod modo oblatrando stentantur. Sic namque diplomata ostendenda sunt.